2020 сыл ыам ыйын 16 күнүгэр СӨ Национальнай художественнай мусуойа, Мусуойдар Аан дойдутааҕы күннэрин чэрчитинэн, аан бастакы онлайн форматка ыытыллар Бүтүн Арассыыйатааҕы “Ночь музеев-2020” акцияҕа кыттар.
Бырагыраамаҕа виртуальнай быыстапкалар, видеоэкскурсиялар, оҕолорго да, улахан дьоҥҥо да акварель кыраасканан уруһуйдуурга маастар-кылаастар, худуоһунньуктардыын айар көрсүһүүлэр, мусуой акциялара, мобильнай сыһыарыыга уонна «Artefact» платформаҕа мультимедиа гид сүрэхтэниитэ, о.д.а. интэриэһинэй тэрээһиннэр бааллар.
Дьону туох түмэрий, биир санаалыырый? Бу, киһи аймахха, уопсастыбаҕа үйэттэн үйэҕэ бэриллэн иһэр ыйытыыларга култуура уонна искусство хоруйу сылайбакка көрдүүр…
“Аан дойдуну истэбит” («Слушая мир») тиэмэ биһигини саха уһулуччулаах худуоһунньуга Афанасий Мунхалов айымньытыгар сирдээн аҕалар. Бу бэлиэ гравюра бэйэтин дириҥ, сүдү суолталаах ис хоһоонунан бүгүн хаһааҥҥытааҕар даҕаны тоҕоостоох. Композиция олус чопчутук уонна сытыытык, виртуальнай эйгэҕэ информация быыстала суох кэҥии, тэнийэ туруута дьиҥнээх олох ис хоһоонугар дьайыытын көрдөрөр. Искусство айымньылара, араас эпохаларга, араас историческай усулуобуйаларга киһи аймах кутун-сүрүн, дьоһун аатын уонна чиэһин хайдах араҥаччылаан, харыстаан илдьэ кэлбит тугунан да кэмнэммэт баай уопутун биһиэхэ тиэрдэллэр.
Ыалдьыттары, Улуу кыайыы 75 сылыгар аналлаах «Кыайыы – саҥа эпос» быыстапкалыыр бырайыак чэрчитинэн айымньылар тустарынан мусуой үлэһиттэрин видео-кэпсээннэрэ уонна «Пульс 60-х» быыстапка чэрчитинэн, живописец-худуоһунньук М.В.Лукин төрөөбүтэ 90 сылыгар анаан, кини айар үлэтин туһунан видео-экскурсия, о.д.а. видео-рубрикалар күүтэллэр.
Мусуой сайтыгар ыалдьыттар «Өлүөнэ туһунан тойук» диэн кэрэ, бука бары киэн туттар өрүспүтүн ойуулаан көрдөрөр живописнай айымньыларынан, сахаттан бастакы идэтийбит худуоһунньук Петр Петрович Романов уонна уһулуччу талааннаах муосчут Семен Николаевич Пестерев айар үлэлэригэр аналлаах быыстапкаларынан — мусуой виртуальнай бырайыактарынан айанныахтара.
Бу күн график-худуоһунньук Наталья Гаврильева «Сардаана» маастар-кылааһы, арт-педагог Мария Мищенко «Акварельнай букет» маастар кылааһы ыытыахтара. Итиэннэ НХМ «Туруйачаанна оҥор» акцияны оҥорон, арт-челлендж саҕалыаҕа. Instagram @sakhamuseum1928 быһа эфиринэн биллэр-көстөр живописец-худуоһунньуктары Анна Осипованы уонна Семен Лукансины кытта айар көрсүһүүлэр ыытыллыахтара.
Онон, онлайн форматынан ыытыллар култуура тэрээһинигэр көхтөөхтүк кыттаргытыгар ыҥырабыт.
Бырагырааманы shorturl.at/gizE4 .ссылканан сиһилии билсиэххитин сөп.
Мусуой акцияҕа кыттар сүрүн интэриниэт-бэрэстэбиитэлистибэлэрэ:
- СӨ НХМ официальнай сайта sakhamuseum.ru
- Instagram: @sakhamuseum1928
- Youtube-ханаал: https://www.youtube.com/channel/UCB9jKEQpQtHLA265DMIf33A
- Facebook: https://www.facebook.com/sakhamuseum1928
- Мусуой блога: https://dnevniki.ykt.ru/sakhamuseum
- Google Arts & Culture платформа: https://artsandculture.google.com/partner/yakutia-national-fine-arts-museum?hl=ru
** Акварельга маастар-кылаастар Zoom платформаҕа онлайн ыытыллаллар. Кыттыан баҕалаахтар сайаапкаларгытын маннык нүөмэргэ ыытыҥ: +79627350507 (WhatsApp) эбэтэр @sakhamuseum1928 (Instagram). Миэстэ ахсаана хааччахтаах, онон учуоттаныҥ.
Акция официальнай хештегтэрэ #ночьвмузее, #museumnight, #sakhamuseum