Ыам ыйын 23-гэр аан дойду үрдүнэн Тустуу күнэ бэлиэтэнэр. Бу күн 1904 сыллаахха Венаҕа тустууга аан дойду бастакы чөмпүйэнээтэ ыытыллыбыта. 2013 сылтан спорт бу көрүҥүнэн дьарыктанааччылар бырааһынньыктарынан билиниллибитэ.
edersaas.ru
Сахабыт сиригэр көҥүл тустууга бастакы чөмпүйэнээт 1956 сыл олунньу 24-гэр буолбута. Онно аҕыс улуустан 34 бөҕөс кыттыыны ылбыта. Ити кэмтэн ыла энтузиастар, физкультурнай, спортивнай хамсааһын тэрийээччилэрэ — Николай Николаевич Тарский, ССРС, РСФСР, Саха АССР үтүөлээх тириэньэрэ Дмитрий Петрович Коркин, РСФСР, Саха АССР үтүөлээх тириэньэрэ Николай Николаевич Волков бэйэни харыстаммат үлэлэринэн, салалталарынан өрөспүүбүлүкэҕэ тустуу сайдан барбыта.
1964 сыллаахха Дьокуускайга көҥүл тустууга РСФСР чөмпүйэнээтэ аан бастаан ыытыллыбыта. Онно Саха сирин бөҕөстөрө Алкивиад Иванов, Петр Алексеев, Альберт Захаров, Эдуард Гегеев кыһыл көмүс, Николай Гоголев, Алексей Ермолаев, Владимир Данилов үрүҥ көмүс мэтээллэри ылбыттара, Николай Алексеев үһүс миэстэҕэ тахсыбыта.
1972 сыллаахха ыытыллыбыт Мюнхеннааҕы Олимпийскай оонньууларга Роман Дмитриев сахалартан бастакынан кыһыл көмүс мэтээли ылары ситиспитэ. Онтон түөрт сыл буолан баран саха тустуутугар өрөгөйдөөх кэм үүммүтэ — Дмитрий Петрович Коркин үс иитиллээччитэ Олимпы дабайбыта – Павел Пинигин Монреаллааҕы ХХI сайыҥҥы Олимпийскай оонньуулар чөмпүйүөннэринэн, Роман Дмитриев итиэннэ Александр Иванов – үрүҥ көмүс призердарынан буолбуттара.
Саха сирин аатын араас түһүлгэлэргэ Василий Румянцевы, Кирилл Григорьевы, Дмитрий Даниловы, Петр Гаврильевы, Николай Гоголевы, Максим Сибирякову, Петр Алексеевы, Алкивиад Иванову, Альберт Захаровы, Вячеслав Карповы, Петр Попову, Алексей Ермолаевы, Семен Морфуновы, Николай Неустроевы, Владимир Радченконы, Игорь Кудрявцевы, Прокопий Шестаковы, Гавриил Дмитриевы, Николай Захаровы, Илларион Федосеевы, Семен Макаровы, Григорий Христофоровы, Василий Гоголевы, Егор Алексеевы, Петр Христофоровы, Михаил Ноговицыны, Василий Алексеевы, Егор Борисовы, Алексей Диодоровы, Иннокентий Зыряновы, Роман Цыпандины, Владимир Яковлевы, Артур Константиновы, Егор Старостины, Иннокентий Аянитовы, Герман Контоевы, Василий Стручкову, Николай Яковлевы, Петр Малардыровы, Степан Сивцевы, Валерий Керемясовы, Михаил Протопоповы, Владимир Торговкины, Артур Федоровы, Петр Юмшановы, Егор Охлопковы, Александр Контоевы, Прокопий Петрову, Леонид Спиридоновы, Виктор Лебедевы уо.д.а. дорҕоонноохтук ааттаппыттара.
Бүгүн саҥа көлүөнэ тустууктар: аан дойду боруонса призера, Европа түөрт төгүллээх призера Владислав Андреев, Сурдлимпиада чөмпүйүөнэ Василий Стрекаловскай, Азия чөмпүйүөнэ Айаал Лазарев, Арассыыйа чөмпүйүөннэрэ, призердара Егор Пономарев, Виктор Рассадин, Ньургун Скрябин, Ариан Тютрин, Вячеслав Ефремов, Дмитрий Аксенов уо.д.а. бэйэлэрин ааттарын тустуу устуоруйатыгар суруйаллар.
Роман Попов, edersaas.ru