Аан дойду сүрүн харыйалара
Олох-дьаһах - Эдэр саас

Аан дойду сүрүн харыйалара

Аан дойду бүгүн Саҥа дьылы көрсүөҕэ. Бу бырааһынньык саамай биллэр бэлиэтинэн киэргэтиллибит харыйа буолар. Араас дойдулар киин куораттарыгар ахсынньыга дойду “кылаабынай” харыйалара тураллар. Быйыл хайдах быһыылаах харыйалар ханна турбуттарын туһунан кылгастык ахтан ааһыаххайыҥ.

edersaas.ru

Арассыыйа, Москва

25 миэтэрэ уһуннаах харыйаны Бородинскай тыа хаһаайыстыбатыттан кэрдэн аҕалан Соборнай болуоссакка туруордулар. Харыйаны үгэс быһыытынан 20 сыл устата туһаныллыбыт харыйа оонньуурдарынан киэргэттилэр. Ону таһынан быйыл харыйаны WorldSkills национальнай сборнай оҕолоро бэйэлэрэ оҥорбут киэргэллэринэн симээбиттэрэ. Арассыыйа бэрэсидьиэнин дьыалаларынан дьарыктанар салалта пресс-сэкэрэтээрэ Елена Крылова этэринэн, быйыл харыйаҕа тыһыынчаттан тахса киэргэл ыйанна, гирляндалар уһуннара биир килэмиэтиртэн тахса уһуннаах. Дойдубут сүрүн харыйата 90 сылтан ордук Кремль болуоссатыгар туруоруллар.

Фото https://www.m24.ru

АХШ, Нью-Йорк
Америка сүрүн харыйата үгэс быһыытынан Рокфеллер киинин таһыгар ахсынньы 4 күнүгэр лаглайа турбута. Бу сиргэ улахан харыйаны туруорар абыычайы тутуу үлэһиттэрэ киллэрбиттэрэ — 1930-с сылларга Рокфеллер киинин тута сылдьар үлэһиттэр аан-маҥнайгынан тутуу быласааккатыгар харыйа туруорбуттар.
Быйыл бу сиргэ 23 миэтэрэ уһуннаах харыйаны Флорида диэн ааттаах кыра куорат таһыттан (Нью-Йорк штат) икки күн айаннаан аҕалбыттара.

Фото https://www.forumdaily.com

Дания, Копенгаген

Копенгаген куорат Тиволи диэн ааттаах сүрүн пааркатыгар быйыл дьикти харыйа турда. Чыпчаалыттан алларааҥы лабааларыгар тиийэ Swarovski кристалларынан киэргэтиллибит харыйа олус кэрэтик көстөр. Ити сиэдэрэй киэргэл уопсай сыаната 150 тыһыынча дуоллартан таҕыста. Харыйаны үс биллииллээх декоратор уон күн киэргэппиттэр.

Фото https://joinfo.ua

Великобритания, Лондон

Великобритания сүрүн харыйатын өр сыллардаах үгэһинэн Норвегияттан аҕалаллар. Быйыл Трафальгар болуоссатыгар турбут харыйа Лондон олохтоохторун соччо үөрдүбэтэ. Элбэх киһи быйылгы харыйаны «курус уонна дьадаҥы» көрүҥнээҕинэн аахтылар. Ол эрээри сорохтор харыйаны көмүскэһэллэр: «Бэлэх аата бэлэх, маннык даҕаны харыйаны махтана көсүөххэйин”, — дииллэр.

Фото https://www.bbc.com

Австралия, Сидней

Бу сыл Австралияҕа күүстээх тыа баһаардара туран, улахан иэннээх сирдэри олоччу уот сиэтэ. Онон Саҥа дьыллааҕы харыйа оннугар “Умайбыт мас” диэн ааттаах инсталляция турда. Харыйа оннугар турбут оҥоһук бүтүн материк араас оройуоннарыттан аҕалыллыбыт талахтарынан, бэрэбинэлэринэн, лабааларынан таҥыллыбыт.

Фото https://news.liga.net/

Егор Карпов, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

3 + десять =