Аҕа ууһун салгыыр уолаттардаах Георгий Оконушкин

Бөлөххө киир:

Кэлиҥҥи сылларга Хатаска эр дьон түмсүүтэ элбэх – аҕалар, булчуттар, суоппардар, футболистар, мадьынылар, тустууну сэргээччилэр түмсүүлэрэ, Хатас орто оскуолатын эр дьонун ансаамбыла уо.д.а.

edersaas.ru

Алта уол оҕолоох Георгий Вильгельмович Оконушкин Олятыныын 2002 сыллаахха ыал буолбуттара. Георгий элбэх оҕолоох дьиэ кэргэҥҥэ төрөөбүт буолан, элбэх буолар үчүгэ­йин кыра эрдэҕиттэн билэн улааппыта. Элбэх оҕолоох дьиэ кэргэн оҕолоро хаһан баҕарар, хайа да кэмҥэ көмүскэллээх, халыҥ ха­­маандалаах буолаллар. Дьону кытта алтыһарга, быһаарсарга, кэпсэтэргэ-ипсэтэргэ, үлэлииргэ-хамсыырга бэлэмнээх буолаллар. Ол көстүү чаҕылхай туоһутунан бу дьиэ кэргэн буолар.

Ольгалаах Георгий бэйэлэрэ ис иһиттэн үлэһит, этэргэ дылы, сири хоруйа сытар дьон. Хаһан да, хайа да кэмҥэ биэрэри, көмөлөһөрү кэтэспэккэ, бэйэлэрэ дьаһанан, үлэлээн хамсаан кэллилэр. Аны судаарыстыба биэрбит көмөтүн сыа-сым курдук тутан, бэйэлэрэ бас билэр дьиэлээхтэр, массыыналаахтар. Георгий Дьокуускай куорат дьаһалтатын көмөтүнэн үчүгэй иһэрдэр аппараат атыылаһан, дьоҥҥо бэйэтэ көмөлөһөр түгэнэ аҕыйаҕа суох. Ол курдук, Хатаска киирэн истэххэ, «Хатаспын таптыыбын» диэн суругу иһэрдибитэ, субуотунньуктарга бэрт улгумнук кыттар.

Уолаттар бары сытыы-хотуу буола улааталлар. Кинилэр ортолоругар футболистар, тустууктар, сүүрүктэр бааллар. Билигин бачча буоллулар, оччо буоллулар диир эрдэ эрээри, бары тыл-өс сайдыытыгар чаҕылхайдар, дэлэҕэ дьиэ кэргэнинэн олоҥхо ааҕыахтара дуо?

«Уолаттарым улаатан эрэллэрин дьэ бэркэ билэн эрэбин», – диэн Георгий бу сайын үөрэ-көтө эппиттээх. Оччолорго кинилэр ­дьиэлэригэр күүлэ тутан тиритэ-хорута, түбүгүрэ сылдьаллара. Аны күһүҥҥү, сааскы кэмҥэ муус ылыыта, атыылааһына эмиэ алта уоллаах дьиэ кэргэҥҥэ таҥас-сап, ас-үөл, үөрэххэ, успуорка наадалаах тэриллэри ыларга төһүү күүс буолар. Онон, оҕолор кыра эрдэхтэриттэн дьиэ-кэргэн үбүн-харчытын суоттаһан, тэҥҥэ үлэлэһэн, үп-харчы хантан кэлэрин билэллэр.

Оконушкиннар дьиэ кэргэнинэн түөлбэлэрин, нэһилиэктэрин, оскуолаларын, куораттарын уопсастыбаннай олоҕор куруук кыттыһаллар.

Надежда Егорова, edersaas.ru

+1
0
+1
0
+1
0
+1
0
+1
0
+1
0
+1
0