Мэҥэ бэлиэ туруорулунна

Ааптар: 
Бөлөххө киир:

Бүгүн Горнай улууһугар, Бэрдьигэстээххэ, бэлиэ күн буолла. С.С.Михайлов аатынан уулуссаҕа мэҥэ бэлиэ туруорулунна. Сиһилии улуус дьаһалтатын тэрийэр-правовой отделын начаалынньыга Айталина Санникова:

— Горнай улууһун Бэрдьигэстээх нэһилиэгэ сылын ахсын кэҥээн, ыччат олохсуйан, аныгы олох ситимин кытта тэҥҥэ баран иһэрбититтэн үөрэбит. Биһиэхэ саҥа  тупсаҕай тутуулаах дьиэ элбиир, саҥа уулуссалар баар буолан иһэллэр. Бу барыта сайдыыны бигэргэтэр. Маныаха нэһилиэкпит, улууспут сайдыытыгар сүҥкэн кылааттаах дьоммут ааттарын үйэтитэн оҕолоро, сиэннэрэ, аймахтара өйдөбүнньүк мэҥэ бэлиэлэри туруоруулара үтүө үгэскэ кубулуйда.
Ол биир туоһутунан бүгүн СӨ үтүөлээх бырааһа, Горнай улууһун бочуоттаах олохтооҕо, 1995-2003 сылларга улуустааҕы киин балыыһа кылаабынай бырааһынан утүө суобастаахтык улэлээбит Спиридон Спиридонович Михайлов сырдык аатын үйэтитэн, кини аатынан уулууссаҕа мэҥэ бэлиэни туруорар үөрүүлээх тэрээһин буолла. Бэрдьигэстээх дьаһалтатын өйөбүлүнэн 2017 сыллаахха нэһилиэккэ Спиридон Спиридонович Михайлов олорбут уонна улэлээбит түөлбэтигэр саҥа тэриллибит уулууса аһыллыбыта. Билигин уулусса 17 учаастакка араарыллан, саҥа дьиэлэр дьэндэйэн эрэллэр.
Спиридон Спиридонович быраас идэтин баһылаан, төрөөбүт улууһугар кэлэн 1972-1981 сылларга терапевтаабыта. 1986 сылтан киин балыыһа кылаабынай бырааһын солбуйааччынан, 1995 сылтан кылаабынай бырааһынан үлэлээбитэ. 2004 с. сэллиги эмтиир улуустааҕы диспансер кылаабынай бырааһынан ананан, олоҕун тиһэх күнүгэр диэри бэриниилээхтик үлэлээбитэ.
Горнай улууһун баһылыга Никита Андреев тыл этэригэр манныкка тохтоото:
— Спиридон Спиридонович туруорсуутунан уонна сатабыллаах салайыытынан Бэрдьигэстээххэ таас балыыһа комплекса бырайыактаммыта. Улуус эмтиир-чэбидигэрдэр тэрилтэрин кадр өттүнэн тупсарыыга, материальнай-техническэй базаларын бөҕөргөтүүгэ дьүккүөрдээхтик үлэлэспитэ. Спиридон Спиридонович оҕолорун, аймахтарын өйөбүллэринэн мэҥэ өйдөбүнньүк туруоруллубута улуус олоҕор-дьаһаҕар бэлиэ түгэнинэн буолар.
Доруобуйа харыстабылын бэтэрээннэрин уонна Спиридон Спиридоновиһы кытта бииргэ алтыһан үлэлээбит кэлиэгэлэрин ааттытан бииргэ төрөөбүт эдьиийэ тыыл бэтэрээнэ, СӨ Бочуоттаах бэтэрээнэ, СӨ доруобуйа харыстабылын туйгуна, Бэрдьигэстээх нэһилиэгин Бочуоттаах олохтооҕо Аграфена Михайлова иһирэхтик ахтан ааста.
Улуустааҕы кииннэммит балыыһа ааттыттан профком бэрэссэдээтэлэ Раиса Корнилова Спиридон Спиридонович улууска доруобуйа харыстабылын сайдыытыгар киллэрбит сүҥкэн кылаатын сиһилии кэпсээтэ.
Спиридон Спиридонович кыыһа Дьокуускай к. өрөспүүбүлүкэтээҕи 2-с нүөмэрдээх балыыһа бырааһа, СӨ доруобуйа харыстабылын туйгуна Светлана Михайлова аҕаларын
сырдык аатын үйэтитиигэ үлэлэспит Горнай улууһун баһылыгар Никита Андреевка, Бэрдьигэстээх нэһилиэгин баһылыгар Марк Парфеновка, балыыһа кэлэктиибигэр, аймахтарыгар махтал тылын дьиэ кэргэнин, бииргэ төрөөбүттэрин ааттарыттан тириэртэ.
Бэлиэ тэрээһиҥҥэ мустубут нэһилиэк олохтоохторо төрөөбүт дойдуларын туһугар бэриниилээхтик үлэлээбит, сыраласпыт ытык дьоҥҥо өйдөбүнньүк тэрээһиннэр ыытыллаллара, анал бэлиэлэр туруоруллара саамай сөптөөх буоларын эппиттэр. Кэнчээри ыччакка маннык дьаһанан үлэлээһин өйдөрүгэр-санааларыгар үтүөнү, кэрэни эрэ иҥэриэҕэр эрэнэллэрин биллэрбиттэр.
Биһиги корр., «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0