65-тэн аҕа саастаах Дьокуускай куорат уонна Жатай бөһүөлэк  олохтоохторугар бэйэни изоляцияланыы эрэсиимин туһунан

65-тэн аҕа саастаах Дьокуускай куорат уонна Жатай бөһүөлэк  олохтоохторугар бэйэни изоляцияланыы эрэсиимин туһунан Саха Өрөспүүбүлүкэтин Ил Дарханын 2020 сыл кулун тутар 24 күнүнээҕи 1075 №-дээх Ыйааҕынан киллэриллибит эбии дьаһалларга суһал штаб быһаарыыта.

1. Бэйэни изоляцияланыы эрэсиимин ким тутуһарый?

65-тэн аҕа саастаах Дьокуускай куорат уонна Жатай бөһүөлэк олохтоохторугар кулун тутар 24 күнүттэн бэйэни изоляцияланыы эрэсиимэ киирэр.

Бэйэни изоляцияланыы эрэсиимэ эпидемиологическай быһыы-майгы көнүөр диэри тарҕанар.

2. Бэйэни изоляцияланыы диэн тугуй?

Бэйэни изоляцияланыы эрэсиимэ – кыбартыыраттан (чааһынай дьиэттэн) тахсыбакка олоруу. Мүлчүрүйбэт кыһалҕа тирээтэҕинэ эрэ дьон суох кэмигэр уонна мааска кэтэн баран тахсыахха сөп.

3. Бэйэни изоляцияланыы эрэсиимэ кимиэхэ дьайбатый?

Бэйэни изоляцияланыы эрэсиимин тутуһуу эбэһээтэлистибэтэ маннык категориялаах 65-тэн аҕа саастаах гражданнарга тарҕаммат:

• предприятиеларга, тэрилтэлэргэ, учреждениеларга уонна судаарыстыбаннай былаас уорганнарыгар үлэлиир миэстэлэригэр бааллара тыын суолталаах салайааччыларга уонна үлэһиттэргэ;
• доруобуйа харыстабылын үлэһиттэригэр.

4. Ил Дархан 1075 №-дээх Ыйааҕынан көрүллүбүт төлөбүр кимиэхэ бэриллэрий?

Биир кэмнээх төлөбүр 65-тэн аҕа саастаах гражданнарга бэриллэр: 2 000 солкуобайы бэйэни изоляцияланыы эрэсиимэ саҕаламмытын кэнниттэн уонна 2 000 солкуобайы бэйэни изоляцияланыы эрэсиимэ түмүктэммитин кэнниттэн, өскөтүн бу эрэсиими тутуспут буоллахтарына.

5. Бу төлөбүр хайдах бэриллэрий?

Бу төлөбүр  Дьокуускай куорат Нэһилиэнньэ социальнай көмүскэлигэр уонна үлэҕэ управлениетыгар учуокка турар 65-тэн аҕа саастаах гражданнарга ыйдааҕы социальнай төлөбүр ылар счеттарыгар түһэр. Төлөбүрү ыларга сайабылыанньа биэрэр ирдэммэт.

6. Аҕам саастаах гражданнарга бэйэни изоляцияланыы кэмигэр үөскүүр олох-дьаһах кыһалҕаларын быһаарарга ким көмөлөһөрүй?

Социальнай үлэһиттэр уонна волонтердар күүс-көмө буолуохтара. Өскөтүн аҕам саастаах дьон психологическай көмөҕө наадыйар, итиэннэ аһынан-үөлүнэн, хаһаайыстыбаннай табаарынан, эминэн-томунан бэйэлэрин хааччыйар кыахтара суох түбэлтэлэригэр бу нүөмэрдэргэ эрийиэхтэрин сөп:

8(965) 996 48 08          8(800) 200 34 11

8(924) 867 88 58          8(914) 229 09 54

8(924) 178 43 77

7. Диспансер кэтэбилигэр сылдьар аҕам саастаах дьон ырысыабы хайдах ылаллар?

Диспансер кэтэбилигэр сылдьар 65-тэн аҕа саастаах гражданнар сыһыарыллыбыт балыыһаларын “суһал линиятыгар” эрийэн дистанционнай көрүҥүнэн ырысыап суруйтараллар. Соҕотох олорор ыарыһахтарга эмп-том дьиэлэригэр тиэрдиллэр.

8. Бэйэни изоляцияланыы эрэсиимигэр олорор дьон ОДьКХ өҥөтүн хайдах төлүүрүй? Хомунаалынай төлөбүрдэри электроннай көрүҥүнэн төлүөххэ сөп:

— «Электронное ЖКХ» портал нөҥүө: http://dom.e-yakutia.ru (бу порталга үлэлиир УК, РСО, ТСЖ туһунан иһитиннэрии саайтка баар);

— ГИС ЖКХ: https://dom.gosuslugi.ru/ саайтыгар тус кэбиниэт нөҥүө;

— өҥөнү оҥорор тэрилтэлэр саайтарыгар тус кэбиниэт нөҥүө (ПАО «Якутскэнерго» ПАУо, «Водоканал» АУо, «СӨ ОДьКХ» ГУТ уо.д.а.);

— төлөбүр агеннарын нөҥүө (Россия Почтата, бааннар).

Өҥөнү оҥорор тэрилтэлэргэ 65-тэн аҕа саастаах гражданнар бэйэни изоляцияланыы эрэсиимин тутуһар кэмнэригэр ОДьКХ төлөбүрүн хойутатыыга ыстараап уонна пеня аахпаттарыгар этилиннэ.

Маны таһынан, «Субсидия ааҕыныстыбата» СӨ ГКУ хомунаалынай өҥө төлөбүрүгэр уонна хапытаалынай өрөмүөн усунуоһун толуйарга субсидияны оҥоруу докумуоннарын булгуччу электроннай көрүҥүнэн судаарыстыбаннай уонна муниципальнай өҥө порталын www.e-yakutia.ru нөҥүө ылар.

Хаартыска интэриниэттэн