Коронавирус сыстыганнаах дьаҥа өрө туран, оскуолаларыгар тиһэх чуораан чугдаарбатаҕынан, оҕолор бу күннэргэ онлайн-эрэсииминэн үөрэммит кыһаларыгар махтаналлар.
edersaas.ru
Быйыл Өймөкөөн улууһун орто оскуолаларын 67, тохсус кылааһы — 111 оҕо үөрэнэн бүтэрэр. Кыһыл көмүс мэтээлинэн түөрт үөрэнээччи бүтэрээри бэлэмнэнэр: Уус-Ньара гимназиятын — икки, Г.А. Кривошапкин аатынан Төрүт орто оскуолатын уонна Н.О. Кривошапкин аатынан Өймөкөөн орто оскуолатын — биирдии выпускник.
Н.М. Заболоцкай-Чысхаан аатынан Томтор орто оскуолатын 13 оҕо бүтэрэр. Өрөспүүбүлүкэ бары оскуолаларын оҕолоро ZOOM форматынан учууталларыгар махтаннылар, бэйэлэригэр анаммыт эҕэрдэ бастыҥын иһиттилэр.
Быйылгы выпускниктары үөрүүлээх күннэринэн оройуон кииниттэн, Уус-Ньараттан, онлайн-эрэсииминэн улуус баһылыга, Н.М. Заболоцкай-Чысхаан аатынан Томтор орто оскуолатын выпускнига Иннокентий Сивцев эҕэрдэлээтэ.
Кини бэйэтин оскуолатын учууталларыгар истиҥник махтанан туран, олох суолугар саҥа үктэнэр оҕолорго ситиһиилэринэн кынаттанан, санаабыттарын барытын толороллоругар баҕарда уонна идэлэрин таба талан, төрөөбүт улуустарын социальнай-экэнэмиичэскэй сайдыытыгар кылааттарын киллэрсэллэригэр эрэнэрин биллэрдэ.
Быйылгы выпускниктар тустарынан оскуола иһинэн тахсар «Чуурукта» оскуола хаһыатын юнкора Тимур Егоров бу курдук кэпсиир:
— Оскуоланы бүтэрээччилэр Тымныы полюһун — Өймөкөөн улууһун Томтор орто оскуолатын устуоруйатыгар киирэр үбүлүөйдээх выпустар. Ол курдук, бу оҕолор 50-с выпуһунан буолаллар. 1969 с. үөрэх дьылын саҕаланыытыгар балаҕан ыйын 1 күнүгэр Томтор нэһилиэгэр саҥа орто оскуола үлэҕэ киирбитэ. Аны быйыл таас оскуолаҕа үөрэнэ киирдибит. Онон бу оскуола 1-кы выпуһа буолалларынан быйылгы выпускниктар устуоруйаҕа киирэллэр. Биһиги доҕотторбут оскуолатааҕы, улуустааҕы, өрөспүүбүлүкэтээҕи эрэ буолбакка, аан дойдутааҕы таһымнаах куонкурустарга, кэмпириэнсийэлэргэ кыттыыны ылбыт оҕолор.
Быйыл Өймөкөөн улууһа 100 сыллаах, Улуу Кыайыы 75 cыллаах үбүлүөйдэригэр оскуолабыт 50-c выпуһа, саҥа таас оскуола 1-кы выпуһа — бу барыта 2020 сылга оскуоланы бүтэрбит оҕолор олохторугар умнуллубат өйдөбүлүнэн буолуоҕа. Биһиги кинилэри кытта биир оскуолаҕа үөрэммиппитинэн киэн туттабыт уонна олохторугар өрүү ситиһии аргыстаналларыгар баҕарабыт.
Кырдьык да, төһө да уустук кэм буоллар, быйылгы выпускниктар оскуолатааҕы кэмнэриттэн өйдүү-саныы сылдьаллара үгүс буоллаҕа. Оскуоланы бүтэрээччилэргэ бары эксээмэннэрин туттаран, сөбүлүүр идэлэригэр киирэн үөрэнэн, төрөөбүт дойдулара кинилэринэн киэн туттар дьонноро буолалларыгар баҕарабыт.
Елена ПОТОЦКАЯ, «Саха сирэ» хаһыат, edersaas.ru