460 тыһыынча солкуобай сыаналаах браслеты халаабыт киһини туттулар (ВИДЕО)
Сайтпытыгар бу дьыл бэс ыйын 26 күнүгэр «460 тыһыынча сыаналаах браслеты былдьаан баран куоппут (ВИДЕО)» диэн иһитиннэриибит бэчээттэммитэ.
Онно Дьокуускай куоракка бэс ыйын 25 күнүгэр, киэһэ 18.00 чаас саҕана харса-хабыра суох халааһын тахсыбытын суруйбуппут.
Санатар буоллахха, куорат килбэйэр киинигэр турар, дьон сөбүлээн сылдьар «Туймаада» атыы-эргиэн киинигэр «Эгэлгэ» ювелирнай фирма салонугар биир эдэр киһи 11 бриллианнаах кыһыл көмүс браслеты көрө туран, эмискэ хаба тардаат, атахха биллэрбитэ, ол барыта видеокамераҕа уһуллубут этэ.
Халаабыт браслетын сыаната 460 тыһ. солк. сыаналаах.
СӨ ИДьМ-тын пресс-сулууспата иһитиннэрбитинэн, Дьокуускай куорат полициятын уонна ИДьМ холуобунай ирдэбилгэ оперативниктара бу халааһыҥҥа уорбаланааччыны, дьэ, туппуттар. Дьокуускай куораттан төрүттээх, урут сууттана сылдьыбыт 30 саастаах киһи эбит.
Уорбут браслетын атыылаабыт.
Бу чахчынан РФ Холуобунай кодексатын 161-с ыст. 1 чааһынан, ол эбэтэр, халааһын бэлиэтэ баарынан дьыала тэриллэн силиэстийэлэнэр. Бу ыстатыйанан көрүллэр накаастабыл миэрэ — 4 сылга диэри болдьоххо көҥүлү быһыы.
Биһиги корр., «Саха сирэ» хаһыат, edersaas.ru
Хаартыска: интэриниэттэн.