Ааспыт 2019 сыл түмүгүнэн, Тыа хаһаайыстыбатын министиэристибэтин чэрчитинэн, өрөспүүбүлүкэ үрдүнэн 409 киһи саҥа дьиэни тутунна.
edersaas.ru
Саҥа дьиэ туттубут дьонтон 207 киһи тыа хаһаайыстыбатыгар быһаччы үлэлииллэр. Бу хайысха «2012-2020 сс. тыа хаһаайыстыбатын сайдыытын итиэннэ тыа хаһаайыстыбатын бородууксуйатын, сырье уонна ас-үөл ырыынагын сүрүннээһин» судаарыстыбаннай бырагыраама «Тыа сирин кэлим сайыннарыы» хос бырагырааматынан үбүлэммитэ. Барыта 509,3 мөл. солк, ол иһигэр федеральнай бүддьүөттэн 468,5 мөл., өрөспүүбүлүкэ бүддьүөтүттэн 40,7 мөл. солк көрүллүбүтэ.
Үүммүт 2020 сылтан олорор дьиэни-уоту тупсарыы «2020-2025 сс. тыа сирин кэлим сайыннарыы» судаарыстыбаннай бырагырааманан салайыллыаҕа. Бу сыалга өрөспүүбүлүкэттэн 69,7 мөл. солк көрүллэн, тыа сиригэр 2,3 тыһ. кв. м. иэннээх дьиэ үлэҕэ киллэриллиэҕэ. Наймылаһыы бэрээдэгинэн дьоҥҥо бэриллэр муниципальнай дьиэни-уоту тутууга 25,7 мөл. солк көрүллүөҕэ. Маны таһынан тыа сирин олохтоохторо дьиэ тутталларыгар биитэр дьиэ атыылаһалларыгар чэпчэтиилээх ыстаапканан 2 %-наах ипотека кирэдиитин туһаныахтара. “Тыа сирин ипотекатынан” 21 сааһын туолбут ыччаттартан саҕалаан 64-гэр диэри саастаах дьон 5 мөлүйүөн солкуобай харчыны кирэдиит ылар кыахтаахтар. Бу туһунан Тыа хаһаайыстыбатын министиэристибэтин кэллиэгийэтин мунньаҕар этилиннэ.
Раиса Сибирякова, «Саха сирэ» edersaas.ru