Ил Дархан Айсен Николаев бүгүн, бэс ыйын 2 күнүгэр, өрөспүүбүлүкэҕэ коронавирус балаһыанньатын иһитиннэрдэ.
—Кэнники сууккаҕа өрөспүүбүлүкэҕэ барыта 74 киһи коронавирустаабытын анаалыстара көрдөрбүт буоллаҕына, мантан 67 киһи — Дьокуускайга. Оттон сууккаҕа 37 киһи бу дьаҥтан үтүөрбүтэ бэлиэтэнэр, — диэтэ.
Өрөспүүбүлүкэҕэ коронавирус дьаҥын бохсон ылыныллыбыт хааччахтыыр миэрэлэр уонна Дьокуускайга эбии дьаһаллар ылыллыылара, дезинфекциялыыр, санитарнай үлэлэр ыытыллыбыттара, уопсастыбаннай тырааныспардар, ас-үөл, күннээҕи туттуллар малы-салы атыылыыр маҕаһыыннар үлэлэрин тохтотон тураннар дезинфекциялааһыны тэрийбиттэрэ түмүгү көрдөрөллөрүгэр эрэнэрин биллэрдэ.
Ил Дархан мантан инньэ балаһыанньа оннун-сүнньүн булан көнөн барарыаҕа диэтэ. Итиэннэ билигин Нам уонна Мэҥэ Хаҥалас улуустарыгар, баахтабай бөһүөлэктэргэ дьаҥҥа хаптарбыттар бары балыыһаҕа эмтэнэллэрин бэлиэтээн эттэ.