Саха ыччата сайдан, арааһы сатыыр, аан дойду тэтимин кытта тэҥҥэ хардыылыыр буолла. Ааһан эрэр 2019 сылга аан дойдутааҕы куонкурустарга кыттар, саҥаны айар-тутар, үгүһү үлэлиир-хамныыр ыччаппыт туһунан өссө биирдэ суруйарга сананныбыт.
САХА КЫЫҺА МИСС ААТЫН СҮКТЭ
Сэтинньигэ Мексика Канкун куоратыгар аан дойдутааҕы “Miss Virtual World — 2019” куонкуруска Саха сирин уонна Арассыыйа аатыттан Алена Портнягина кыттан, “I вице-мисс “Miss Virtual World — 2019” буолары ситиспитэ. Аан дойду таһымнаах күрэхтэһиини Саха сиригэр айыллыбыт “InDriver” таксины төлөпүөн сыһыарыытынан сакаастыыр хампаанньа иилээн-саҕалаан ыытта.
СОНУН БЭСТИБЭЭЛ ЫЫТЫЛЫННА
Сайын өрөспүүбүлүкэбитигэр «Leto Yakutia» диэн аныгы култуура бэстибээлэ саҕаламмыта. Улуустар кииннэригэр хас биирдии куорат уонна сэлиэнньэ уратытын бэлиэтиир гына уулуссалары, дьиэлэри киэргэттилэр. Ол курдук, Дьокуускайга, Нерюнгригэ, Мииринэйгэ, Ленскэйгэ, Алдаҥҥа, Өлүөхүмэҕэ, Удачнайга, Бүлүүгэ, Покровскайга, Ньурбаҕа, Орто Халымаҕа, Верхоянскайга, Чурапчыга, Аммаҕа уонна Бэрдьигэстээххэ аныгылыы тыыннаах арт-эбийиэктэр баар буоллулар.
“КЫАЙЫЫ ДИКТАНЫН” КЫАЙЫЫЛААҔА – ПАВЕЛ СУДИКО
Мэҥэ Хаҥалас улууһугар Майа сэлиэнньэтин дьокутааттарын уонна Саха сирин эдэр дьокутааттарын сэбиэттэрин бэрэссэдээтэлэ Павел Судико Бүтүн Арассыыйатааҕы “Кыайыы диктаныгар” биэс мүнүүтэ иһигэр сөптөөх хоруйдары биэрэн, бастакы миэстэни ылбыта. Бу диктаҥҥа араас дойдуттан 150 000-тан тахса киһи кыттыбыт.
JOBJOB ӨҤӨТҮНЭН ТУҺАНАР БУОЛЛУБУТ
Саха уолаттара Семен Алексеев уонна Айсен Федоров JobJob диэн төлөпүөн сыһыарыытын айдылар. Манна үлэҕэ эбэтэр көмөҕө наадыйар дьон сакаастарын суруйаллар. Холобур, дьиэ ис-тас үлэтигэр, өрөмүөҥҥэ, ньээҥкэҕэ уо.д.а. наадыйар дьон. Сыһыарыыны IT-паарка резиденнэрэ толкуйдаатылар.
САРДААНА 30 КЫРААДЫС ИТИИГЭ СҮҮРДЭ
Балаҕан ыйыгар Норуоттар икки ардыларынааҕы чэпчэки атлетикаҕа ассоциациялар федерациялара Арассыыйа 11 спортсменыгар күрэхтэһиилэргэ нейтральнай статустаах кыттарыгар көҥүл биэрэн, Саха сириттэн төрүттээх Сардаана Трофимова Катар Доха куоратыгар аан дойду чөмпүйэнээтигэр кыттыбыта. Сардаана 30 кыраадыстаах итиигэ 2:52:46 көрдөрүүлээх сүүрэн, биэтэккэ 22-с кэлбитэ.
КАЛМЫК УОЛА – БАСТЫҤ УЧУУТАЛ
Сыллата ыытыллар “Сыл учуутала-2019” куонкурус кыайыылааҕынан Уус Алдан улууһун Суотту оскуолатын учуутала Роман Оконов буолла. Кини историяны уонна обществознаниены үөрэтэр. Роман Саха сиригэр 2014 сыллаахха, дойдутугар Калмыкияҕа университеты бүтэрээт даҕаны, үлэлии кэлбит.
ҮТҮӨ САНААЛААХ ПЕТР ЧЕРКАШИН
Эдэр урбаанньыт Петр Черкашин баҕа өттүнэн элбэх оҕолоох ыалларга, саастаах дьоҥҥо үтүө көмөнү оҥорбута хас да сыл буолла. Ол курдук, кини аһынан-үөлүнэн, таҥаһынан-сабынан, үлэнэн-хамнаһынан дьоҥҥо көмөлөһөр. Быйылгыттан Петр дьон санаатын уларытар социальнай тиэмэлээх роликтары устан саҕалаабыта үгүс киһи болҕомтотун тарта.
ИНСТАГРАМ САҤА “СУЛУҺА” – ӨТТҮК ЛЕХА
Уруккута КВН-щик Алексей Михайлов “Өттүк Леха” диэн дьоруойу толкуйдаан, “Инстаграм” социальнай ситимҥэ былааһы ылла. Алексей дьоруойун туһанан, көрдөөх тэттик видеолары устар. Аны хас даҕаны бэйэ дьыалатын арынна, онон урбаан эйгэтигэр эрэллээхтик киирдэ. Кэлэр сылга Өттүк Леха сүрүн оруоллаах киинэ көстүөҕэ.
Айтана Аммосова, «Саха сирэ» хаһыат, edersaas.ru