Култуура миниистирэ Юрий Куприянов салайааччылаах бырабыыталыстыба бөлөҕө Горнай улууһугар үлэлээтэ. Уопсайа 9 нэһилиэккэ ыытыллыбыт отчуокка 730-ча киһи кытынна.
edersaas.ru
Ааспыт сылга эдэр ыалларга, тулаайахтарга олорор дьиэнэн хааччыйыыга, бөһүөлэктэр икки ардыларынааҕы гаас ситимин тардыыга 75 мөл. солк. көрүллүбүтэ. Маны таһынан Дьиикимдэҕэ култуура дьиэтин тутууга үбүлээһин көрүллэн, быйыл үлэҕэ киллэриллиэхтээх.
Бэрдьигэстээххэ 98 миэстэлээх оҕо саада, эдэр исписэлиистэргэ анаан Күөрэлээххэ уонна Маҕараска түөртүү кыбартыыралаах олорор дьиэлэр тутуллуохтаахтар.
Бырабыыталыстыба оробуочай бөлөҕө иһитиннэрбитинэн, олохтоох бүддьүөккэ Кировскайдааҕы сынньалаҥ киинин саалатын уларытан спортивнай саала оҥорорго, уу ситимнэрин, оҕо былаһааккаларын тутарга 12 мөл. 930 тыһ. солк. суумалаах субсидия бэриллибит.
Оттон тыа хаһаайыстыбатын сайыннарыыга 138 мөл. солк. субвенция тыырыллыбыт. Чааһынай дьиэлэри гаастааһыҥҥа 48 ыал биир кээмэйдээх аадырыстаах көмөнөн туһаммыттар.
Отчуот кэмигэр Дьарыктаах буолуу сылын түмүгүн таһаардылар. Ол курдук ааспыт сыл устата Дьарыктаах буолуу киинин нөҥүө 297 киһи үлэнэн хааччыллыбыт. 39 үлэтэ суох киһи эбии үөрэммит. Бэйэ дьыалатын саҕалааччыларга 1 мөл. 520 тыһ. солк. көмө оҥоһуллубут.
Биһ. корр., edersaas.ru