2019 сыл Хаҥалас улууһугар Софрон Сыранов 300 сылыгар ананан ааһыаҕа
Хаҥалас улууһун нэһилиэктэрин баһылыктарын сэбиэтигэр ааһан эрэр сыл түмүктэрин таһаардылар уонна 2019 сыл сүрүн тэрээһиннэрин торумнаатылар. Кэлэр сылга Софрон Сыранов төрөөбүтэ 300 сылыгар анаммыт үбүлүөйдээх тэрээһиннэр буолуохтара. Хаҥалас улууһун 1 Маалтааны нэһилиэгин олохтооҕо Саха сиригэр олохтоох салайыныы атаҕар туруутугар улахан өҥөлөөх. Кини Арассыыйаҕа Кэтириинэ ыраахтааҕы сокуоннарын хомуурунньугун оҥорор хамыыһыйа дьокутаата этэ. Бу историяҕа киирбит киһи көмөтүнэн 18-с үйэҕэ сахалар оҕолоро үөрэхтэнэр кыахтаммыттара, Дьокуускай уонна Охотскай аартыктарыгар ыстаансыйалары туппуттара. Маны сэргэ Софрон Сыранов нуучча сулууспалаах дьоно хомуйар, сахалар төлүүргэ ыарырҕаппыт дьаһаахтарын суох гынары уонна итини дьаһайыыны саха кинээстэригэр сүктэрэргэ эппитэ.
Хаҥалас баһылыктара 2019 сылы Софрон Сырановка аныырга быһаардылар. Бу тиэмэҕэ Дьокутааттар оройуоннааҕы сэбиэттэрин бэрэссэдээтэлэ Анатолий Антонов тыл эттэ. Софрон Сырановка анаммыт сыл кини аатын өрөспүүбүлүкэ таһымыгар үйэтитэргэ туһуланыаҕа. Хаҥалас улууһугар Софрон Сыранов аатынан бочуоттаах бэлиэ олохтоох салайыныыга киллэрбит кылаатын иһин туттарыллар. Бастакы дьокутаат төрөөбүт сиригэр мэҥэ бэлиэ туруоруллуоҕа. Режиссер Эдуард Новиков кини туһунан киинэни бэлэмнээтэ.
Бу сыл түмүктэрин уонна кэлэр сылга бүддьүөт тутулун туһунан оройуон үпкэ управлениетын начаалынньыга Александра Кривогорницына иһитиннэрдэ. Чуолаан, кини нолуоктан киирбит дохуоттары ырытта, 2019 сыл бүддьүөтүн торумнааһыны билиһиннэрдэ уонна 2021 сылга диэри былааны чопчулаата.
Оройуон баһылыга Гаврил Алексеев этэринэн, өрөспүүбүлүкэ бырабыыталыстыбатын бэрэссэдээтэлэ Владимир Солодов уонна Ил Түмэн бэрэссэдээтэлэ Петр Гоголев салалталарынан өрөспүүбүлүкэтээҕи тэрийэр хамыыһыйа тэриллиэҕэ. Гаврил Юрьевич бэлиэтээбитинэн, оройуон салалтата Софрон Сыранов аатынан бочуоттаах бэлиэ нэһилиэк, куорат, оройуон сэбиэтин дьокутаатыгар эрэ буолбакка, Саха Өрөспүүбүлүкэтин Судаарыстыбаннай Мунньаҕын дьокутаатыгар туттарылларын туруорсуоҕа.
Өрөспүүбүлүкэҕэ Нэһилиэнньэ дьарыктаах буолуутун сылын түмүктэрин туһунан Нэһилиэнньэ дьарыктаах буолуутун киинин дириэктэрэ Игорь Соловьев иһитиннэрдэ. Ахсынньы 6 күнүнээҕи туругунан, кииҥҥэ 1280 киһи сылдьыбыт, итинтэн 712-тэ тыа сирин олохтооҕо. 652 киһи үлэтэ суох ахсааныгар сылдьар. 531 киһини үлэҕэ ылбыттар. Өрөспүүбүлүкэ бүддьүөтүттэн бу сыалга 3 мөлүйүөн солкуобайтан тахса үп көрүллүбүт.
Василий Марков.