Хапытаалынай өрөмүөн иһин усунуос кээмэйэ, тохсунньу 1 күнүттэн мас дьиэҕэ 1 кв миэтэрэтэ 3 солк. 60 харчы, оттон лиибэ суох таас дьиэҕэ 6 солк., лиифтээх таас дьиэҕэ 8 солк. тэҥнэһиэхтээх. Онон, Дьокуускайга 112 сериялаах 63 кв миэтэрэ иэннээх кыбартыыраҕа олорооччулар ыйга 378 солк. төлүүр буолуохтара. Сылга ааҕан таһаардахха, ботуччу харчы.
Бу мунньуллубут харчы дьиэ өрөмүөнүгэр ыытыллыахтаах. СӨ элбэх кыбартыыралаах дьиэлэри өрөмүөннүүр пуонда сайтыгар (www. fondkr. ru) киирэн, олорор дьиэҕит хаһан өрөмүөннэнэрин киирэн көрүөххүтүн сөп. Холобур, Дьокуускай куорат Дзержинскэй уулуссатыгар баар 12-с нүөмэрдээх дьиэ бастакы куорпуһа өрөмүөн былааныгар 2032 сылга турар. Өссө даҕаны уонтан тахса сыл баар. Бу дьиэ 1995 сыллаахха тутуллубут, 24 кыбартыыралаах. Мантан атын дьиэлэри ылан көрүөххэ. Ярославскай уулусса 11 нүөмэрдээх дьиэтэ 1977 сыллаахха үлэҕэ киирбитэ. Номнуо 40-ча сыл ааста. Хапытаалынай өрөмүөн аны икки сылынан ыытыллыахтаах диэн турар.
Аны мас дьиэлэри көрүөххэ. 1997 сыллаахха тутуллубут Борисовка-2 микро-оройуонун 11 нүөмэрдээх дьиэтэ, өрөмүөн былааныгар 2028 – 2031 сылларга киллэриллибит. Ону даҕаны хас да түһүмэҕинэн. Дьиҥэр, бу канадскай тииптээх дьиэлэр «кылгас болдьоххо» диэн тутуллубуттара ээ. Арааһа, өссө даҕаны 50-ча сыл устата дьону олордор былааннаахтар быһыылаах.
1976 – 1979 сылларга Ильменскэй уулуссатыгар тутуллубут хас да мас дьиэни, ол иһигэр 57-с нүөмэрдээх дьиэ 3-с, 4-с куорпустара былааҥҥа 2015 – 2023 сылларга киирбиттэр.
Өрөмүөн былаанын көрдөххө, эргэрбит дьиэҕэ олорооччулар таах сибиэ харчы төлүү олорор курдуктар. Ааспыт үйэ 70-с сылларыгар тутуллубут дьиэлэр аны хас да сылынан хаарбах туруктаах статустаннахтарына, муспут харчылара таах күдэҥҥэ көтөөхтүүрэ буолуо.
Анивера АКИМОВА.