Сыл саҕаланыытыгар тохсунньу 3 күнүгэр Нам улууһун ытык олохтооҕо, Аҕа дойду Улуу сэриитин кыттыылааҕын огдообото Татьяна Федорова 100 сааһын бэлиэтээбитэ.
edersaas.ru
Татьяна Митрофановна биэс оҕо тапталлаах ийэтэ, 8 сиэн, 8 хос сиэн, биир хос-хос сиэн тапталлаах эбээтэ, хос эбээтэ.
Ытык кырдьаҕас 1919 с. Иркутскай уобалас Тулун куоратыгар күн сирин көрбүт. 1935 с. сэттэ кылаастаах оскуоланы бүтэрэн, орто алын сүһүөх үөрэҕи ылбыт. Ол сыл Софийскайдааҕы сибээс отделениетыгар морзист идэтинэн үлэлээбит. 1945 с. Аҕа дойду Улуу сэриитин кыттыылааҕа Серафим Федоровка кэргэн тахсыбыт. Сыл буолаат, дьиэ кэргэн Саха сирин Амматыгар көспүт. Онно Татьяна Митрофановна Амматааҕы, онтон Мэҥэ Хаҥалас оройуонугар сибээс салаатыгар, Уус Алдан Бороҕонун оройуоннааҕы хонтуоратыгар телеграфиһынан үлэлээбит.
1974 сылтан Федоровтар Нам оройуонугар олохсуйбуттар. 1989 сыллаахха биэнсийэҕэ тахсыар диэри араас үлэҕэ үлэлээбит. Ол эбэтэр 70 сааһыгар үтүөлээх сынньалаҥҥа барбыт!
Татьяна Митрофановна идэтигэр бэриниилээх үлэтин иһин «Аҕа дойду сэриитигэр килбиэннээх үлэтин иһин» мэтээллээх, үбүлүөйүнэй наҕараадалардаах, Бочуотунай кырааматалардаах.
Нам улууһугар ситэриилээх былаас түмүктүүр отчуотун кэнниттэн СӨ Сыана бэлиитикэтигэр судаарыстыбаннай кэмитиэт салайааччыта Антонина Винокурова, улуус дьаһалтатын баһылыга Юрий Слепцов 100 саастаах Татьяна Федороваҕа дьиэтигэр тиийэн, ытык кырдьаҕаһы кытта көрүстүлэр.
— Эһиэхэ, ытык кырдьаҕас дьоммутугар, эйэлээх олоҕу уһансыбыккыт иһин барҕа махталбытын тиэрдэбит, — диэн туран, Антонина Борисовна Нам улууһун 100 саастаах олохтооҕор кытаанах доруобуйаны, этэҥҥэ буолууну баҕарда.
Татьяна Митрофановна билигин да сиэннэригэр эбиэттэрин бэлэмнээн көрсөр эбит. Мэһэйдэтэрэ диэн — истибэт буолбут. Ытык кырдьаҕас оҕолорун, сиэннэрин, хос сиэннэрин тапталларыгар уйдаран, бэрт дьоллоохтук олорор.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.