Үс сыл анараа өттүгэр 2015 с. Эстрада судаарыстыбаннай тыйаатырын дириэктэринэн анаммыт Алексей Егоров — Өркөн бу күннэргэ атын үлэҕэ көһөн эрэрин туһунан «Sakhalife» иһитиннэрэр.
edersaas.ru
Ааспыт нэдиэлэ бээтинсэтигэр, муус устар 20 күнүгэр, тыйаатыр салайааччыта остуол тардан, биир идэлээхтэрэ саҥа үлэҕэ атаарбыттар. Саҥа сиргэ ситиһиини баҕаран туран, саха быһаҕын бэлэхтээбиттэр. Ол курдук, Өркөн «Лена» муниципальнай киинэ тыйаатырын дириэктэринэн үлэлиэҕэ. Кини иннигэр өр кэмҥэ үлэлээбит Алла Якушева бочуоттаах сынньалаҥҥа тахсыбыт. Кэлиҥҥи кэмҥэ дириэктэр эбээһинэһин арт-дириэктэр Георгий Николаев толоро сылдьар.
Куорат дьаһалтатыгар Алексей Егоров кандидатуратын өссө биир ый анараа өттүгэр киллэрбиттэр. Оттон Эстрада тыйаатырын ким салайыай? Кылаабынай режиссер Татьяна Чаранская аатын этэллэр даҕаны, бүтэһик быһаарыы Култуура министиэристибэтэ кими аныырыттан тутулуктаах.
Сылыктаан көрдөххө, эдэр салайааччы «Лена» киинэ тыйаатырын репертуарын сэргэхситиэ, сахалыы киинэ, көр-күлүү жанра сайдыытын, тарҕаныытын саҥа үктэлгэ таһаарыа.
Марианна Тыртыкова, «Саха сирэ», edersaas.ru